Վրթանես սրբազանը Փաշինյանի կողքը նստելուց առաջ կողմնորոշվե՞լ է, թե ինքը որ թեմի առաջնորդն է՝ Արցախի՞, թե՞ Ղարաբաղի. Mediahub

«Կայեն, ո՞ւր է քո եղբայր Աբելը», Աստված հարցրեց Կայենին, որն իր եղբորը սպանել էր նախանձից դրդված։ Նույն հարցը կարելի է տալ Նիկոլ Փաշինյանին հանդիպած սրբազաններին՝ «Տեր Աբրահամ, Տեր Առաքել (Քարամյան), Տեր Վազգեն, Տեր Անուշավան, Տեր Վրթանես, Տեր Առաքել (Տիգրանյան), Տեր Գևորգ սրբազաններ, ո՞ւր է ձեր Վեհափառը»։ Եթե Կայենն Աստծուն պատասխանեց, որ «մի՞թե ես իմ եղբոր պահապանն եմ», ապա նույնը չեք կարող ասեք դուք։ Նիկոլ Փաշինյանի այդ ո՞ր խոսքը դրդեց ձեզ ուրանալու ձեր Վեհափառին, այդ ինչպե՞ս նա կարողացավ ձեզ համոզել իր «իրավացիության մեջ»։ Նայեք յուրաքանչյուրդ հայելու մեջ ու այնտեղ կգտնեք հարցի պատասխանը։ Նիկոլ Փաշինյանը Վեհափառին մեղադրում էր կուսակրոնությունը խախտելու մեջ ու չխոստովանելու, որ զավակ ունի։ Նայեք հայելու մեջ ու նայեք իրար, արդյո՞ք ձեր մեջ չկա մարդ, որը նույնպես խախտել է կուսակրոնության ուխը ու նույնպես չի խոստովանում, որ ունի զավակ։ Դուք իբր վրդովել եք Արշակ Սրբազանի անձնական կյանքից, կրկին նայեք հայելու մեջ ու իրար, արդյո՞ք ձեր բոլորի անկողիններն են մաքուր։ Հիսուս Քրիստոսն ասում էր. «Ձեր միջից անմեղը նախ թող քար գցի դրա վրա»։ Դուք, որ կոչված էիք տարածելու ու պահպանելու Հիսուս Քրիստոսի խոսքը, սակայն միաժամանակ առաջինը գցեցիք քարը, արդյո՞ք դուք իրոք ձեզ անմեղ եք համարում։

Նիկոլ Փաշինյանը ձեզնից չի հարցնում ձեր գործած մեղքերի մասին, որովհետև նրան դա պետք չէ։ Նրան իրականում չեն հետաքրքրում ո՛չ ձեր գործած մեղքերը, ո՛չ ձեր անձնական կյանքը, ո՛չ էլ այն, թե վերածե՞լ եք Աստծո տունը վաճառատան, թե՝ ոչ։ Նրա միակ շարժառիթն է. «Կամ ինձ հետ եք, կամ՝ իմ դեմ»։ Եթե իր հետ եք, ապա ձեզ կներվեն ձեր բոլոր մեղքերը, գոնե ժամանակավոր, քանի դեռ նա չի հասել իր հիմնական նպատակին՝ չի հեռացրել Վեհափառին։ Բայց եթե նա չի հարցնում, դուք նայեք հայելու մեջ ու իրար, արդյո՞ք ձեր մեջ չկա մարդ, որին երբևէ գայթաղկած կլինի օվշորում հաշիվներ ունենալու գաղափարը։ Եթե հարցնում եք ու գտնում եք, որ այնուամենայնիվ մեղավոր եք, ապա դուք մեղանչել եք թե՛ Աստծո, թե՛ հայ ժողովրդի առաջ։ Երեսպաշտ եք, քանի որ լինելով մեղավոր, առաջինն եք նետել քարը, իսկ եթե ձեզ համարում եք կատարյալ անմեղ ու անբիծ, առանց որևէ մեղքի, ապա Աստված եք ու երկրի վրա անելիք չունեք։

Սակայն ամենատարակուսելին Արցախի թեմի առաջնորդ Վրթանես սրբազանի պահվածքն ու ներկայությունն է Նիկոլ Փաշինյանի կողքին։ Փաշինյանի այդ ո՞ր արժանիքի համար ես միացել նրա կողմից Հայ Առաքելական Եկեղեցու վրա հարձակմանը։ Նիկոլ Փաշինյանի ո՞ր քայլերն են քեզ հավատ ներշնչել։ Այն, ո՞ր նա մերժեց զինադադարի բոլոր առաջարկներն ու Արցախը տարավ ամբողջական պարտության միայն նրա համար, որ իրեն դավաճան չասե՞ն։ Այն, որ Արցախի ամբողջական շրջափակման ժամանակ ու Ադրբեջանի կողմից հերթական ներխուժման ընթացքում մատը մատին չխփեց, ինչի համար արժանացավ Ալիևի կողմից գովեստի՞։ Այն, որ Պրահայում Արցախը ճանաչեց Ադրբեջանի կազմում ու հայտարարեց, որ փոշմանել է, որ ավելի շուտ չի ասել Արցախն Ադրբեջանի մաս լինելու մասի՞ն։ Այն, որ Արցախի ռազմաքաղաքական ղեկավարությունը կտտանքների է ենթարկվում Բաքվի բանտերում, իսկ Նիկոլ Փաշինյանը նրանց նույնիսկ գերի չի համարո՞ւմ։ Այն, որ քո հոգևոր եղբայրները, Բագրատ, Միքայել, Մկրտիչ սրբազանները հանուն նաև Արցախի այժմ գտնվում են Երևանի բանտերում, ու դու բացահայտ ուրանո՞ւմ ես նրանց։ Այն, որ դու համարվում ես Արցախի թեմի առաջնորդ, իսկ Նիկոլ Փաշինյանը նույնիսկ Արցախ բառն է մերժում ու արգելում ասել։ Հետևաբար դու հիմա ո՞ր թեմի առաջնորդն ես՝ Արցախի՞, թե՞ Ղարաբաղի, նրա կողքը նստելուց առաջ տվե՞լ ես այդ հարցն ինքդ քեզ։ Վերջապես ինքդ քեզ չե՞ս հարցրել, թե իրականում ինչո՞ւ է հետապնդման ենթարկվում Վեհափառը։ Եթե չես հարցրել, ասենք՝ Արցախի, Վեհափառը հալածվում է հենց Արցախի համար։ Եթե նա նույնպես մտածեր այնպես, ինչպես Նիկոլ Փաշինյանը կամ դու, ապա կուրանար Արցախն ու որևէ խնդիր չէր ունենա։ Սակայն եթե Վեհափառն ուրանար Արցախը, չէիր լինի նաև դու, որովհետև եթե չկար Արցախ, ապա չէր լինի նաև Արցախի թեմ։

Կարեն Կարապետյան

Սկզբնաղբյուրը` Mediahub.am-ի